Un novo sen carné de conducir, que se dirixía a un xuízo por un suposto delito contra a seguridade viaria tras ser recentemente sorprendido ao volante dun turismo, foi identificado por axentes da Garda Civil cando ía de novo conducindo, e ademais o mesmo coche.
O sospeitoso, ao verse sorprendido, tratou de darlles esquinazo aos gardas e estacionou o vehículo entre outros automóbiles no aparcadoiro do Hospital Universitario Lucus Augusti (Hula).
Os feitos sucederon o pasado 16 de setembro, cando unha patrulla da Garda Civil decatouse de que ao volante dun vehículo que circulaba pola autovía A-6, entre os quilómetros 488 e 493, ía un mozo que fora investigado a semana anterior por conducir sen carné.
Por iso, déronlle o alto e incluso fixeron uso dos sinais ópticos e acústicos do vehículo policial para chamar a súa atención, pero o condutor fixo caso omiso, saíu da autovía e circulou polas estradas LU-530 e LU-21 ata chegar ao aparcadoiro do servizo de urxencias do Hula, onde estacionou o vehículo entre outros coches para tratar de darlles esquinazo aos axentes.
No marco da investigación, tamén foi intervido o vehículo que conducía, que foi posto a disposición da autoridade xudicial
Con todo, non logrou despistar aos axentes que o perseguían e que, tras identificalo, detivérono como suposto autor dun delito contra a seguridade viaria, por conducir un vehículo a motor sen obter nunca o correspondente permiso.
Ademais, comprobaron que se trata dun condutor multi-reincidente, xa que conta con diversas investigacións nos últimos meses por conducir vehículos a motor sen permiso, así como tres condenas, con sentenzas firmes, por idénticos delitos neste ano.
No marco da investigación, tamén foi intervido o vehículo que conducía, que foi posto a disposición da autoridade xudicial, dado que, a pesar de non ser propiedade do detido, a Garda Civil logrou acreditar que era usado habitualmente por el.
Posteriormente, en colaboración coa Policía Local de Lugo, procedeuse á retirada do turismo coa guindastre municipal do aparcadoiro do recinto hospitalario, para o seu posterior traslado ao depósito municipal, onde permanecerá a expensas do que ditamine o Xulgado.
Así mesmo, foi imputada como investigada a propietaria do vehículo “como cooperadora necesaria”, dado que era coñecedora de que o detido nunca obtivera permiso de condución.
