A Policía Nacional está a desenvolver unha operación antidroga na que xa foron detidas polo menos dúas persoas en Lugo, membros da mesma familia. A última das detencións levou a cabo na tarde do luns, cando os axentes detectaron na entrada da A-6 ao seu paso por Lugo un vehículo sospeitoso no que eran transportados ao redor de 28 quilos de haxix de gran calidade.
O condutor do coche, ao parecer natural do sur de España, desde onde trasladaba a droga ata Galicia, foi detido e este martes pola tarde foi posto a disposición do xulgado de Instrución 1, que dirixe a investigación. A xuíza Pilar de Lara ordenou o seu ingreso provisional en prisión.
Dáse a circunstancia de que este home é tío dun mozo que foi detido fai ao redor de 15 días case no mesmo punto do percorrido e na mesma situación: transportaba algo máis de cinco quilos no maleteiro do vehículo que conducía. De feito, a circunstancia do parentesco puido pesar na decisión da maxistrada de enviar ao detido deste martes a prisión, xa que deixara en liberdade ao sobriño quince días antes. Os dous detidos son de nacionalidade española e un deles ten residencia nunha localidade de Lugo.
A falta de confirmación oficial, todo apunta a que se trata dunha operación que aínda se mantén aberta e na que está a colaborar a Policía Nacional de Lugo, polo que non se descartan máis detencións en próximas datas.
