Unha lucense de 61 anos e a súa filla, de 39, foron detidas pola Policía Nacional cando viaxaban cunha mochila con cinco quilos e medio de haxix no asento traseiro do coche. As mulleres, con todo, foron postas en liberdade con medidas cautelares tras alegar que o coche non era seu e que elas só ían buscar uns zapatos para unha voda.
A detención, segundo explicaron a estas diario fontes próximas ao caso, produciuse de casualidade, cando os axentes que formaban parte dun dispositivo de control rutineiro nunha das entradas da cidade detiveron o vehículo. A sorpresa chegou cando, ao baixar a ventá a condutora, o cheiro a haxix que desprendía o coche era imposible de ignorar, nin desde o exterior. Resultou que no asento traseiro había unha mochila con cinco quilos e medio de haxix, dispostos xa para a súa venda polo miúdo.
As dúas mulleres foron detidas e postas a disposición xudicial acusadas dun delito de tráfico de drogas. Resultaron ser, ademais, familiares directas de dous coñecidos delincuentes da cidade, que tamén foron sorprendidos en varias ocasións con haxix, ademais de estar implicados noutros delitos de agresión e roubo con forza.
DE VODA. No entanto, as mulleres alegaron non coñecer en absoluto a existencia da mochila. Fontes próximas á investigación explicaron que, segundo o relato que defenderon, elas só se desprazaban para buscar uns zapatos para unha voda. Segundo parece, outra filla da detida casa esta fin de semana, e a filla arrestada deixou os seus zapatos para a festa noutro coche que quedara nun taller.
Ante o risco de que taller non abrise en sábado, dixeron, decidiron ir buscalos. Para iso colleron o coche doutro dos fillos da nai detida, sen saber que detrás portaban tan peculiar equipaxe, e a pesar da intensidade do cheiro que debía desprender, dada a inmediata reacción dos policías.
Pero é que, segundo parece, nin sequera está claro que os cinco quilos e medio de landras pertencesen ao fillo e dono do coche, porque segundo aseguraron as mulleres ese vehículo compárteno moitos membros da familia.
En calquera caso, esta versión bastoulles para ser postas en liberdade con medidas cautelares, aínda que seguen acusadas dun delito de tráfico de drogas.
