Axentes da Policía Nacional detiveron unha lucense que protagonizou un altercado no transcurso dunha actuación musical que se estaba celebrando o luns pola noite na Praza da Soidade, con motivo dos festexos de Entroido. A muller, de 45 anos, ameazou aos asistentes e comezou a lanzar obxectos e botellas, chegando incluso a sacar unha navalla do peto e a retar ao público.
Varias patrullas da Policía Nacional acudiron de inmediato e comprobaron que a muller se atopaba "claramente alterada" e non paraba de ameazar e lanzar cousas á xente, polo que decidiron inmobilizala. Ademais, enfrontouse aos axentes e opuxo resistencia, polo que finalmente foi arrestada como autora dun delito de atentado e desordes. Igualmente, tal e como sinalou o portavoz policial, no traxecto a comisaría, a detida golpeou continuamente os cristais e o biombo do coche patrulla.
Esta muller xa protagonizara outros altercados esa mesma noite na Praza da Constitución e tamén na Avenida da Coruña, onde camiñou polo medio da calzada e cortou o tráfico. A Policía Nacional puxo os feitos en coñecemento do xulgado de garda.
