Axentes da Policía Nacional de Lugo detiveron a unha lucense acusada de estafarlle preto de 34.000 euros á súa curmá para realizar multitude de compras a través de internet.
Os axentes encargados da investigación dos delitos relacionados coas fraudes informáticas abriron unha investigación despois de que unha muller —de 74 anos de idade e natural de Guntín— acudise á comisaría provincial para denunciar que lle estaban desaparecendo da súa conta bancaria diversas cantidades de diñeiro, "de forma reiterada".
Os investigadores iniciaron as pescudas e comprobaron que se realizaron un total de 78 compras por internet con cargo á conta da denunciante. A muller explicou que ela non realizara ningunha das adquisicións e achegou datos que permitiron aos axentes identificar á presunta autora.
Segundo explicou onte o portavoz da Policía Nacional, as compras foran realizadas por unha curmá da afectada. "Para realizar a estafa, a muller fíxose co Documento Nacional de Identidade da vítima e, posteriormente, falsificou os documentos que lle habilitaban para utilizar a conta bancaria", dixo.
A detida contou que o marido da vítima, xa falecido, autorizáraa para acceder e manexar a conta bancaria
Deste xeito, a detida comprou a través de internet un total de 78 artigos de todo tipo, desde produtos de alimentación e roupa, ata artigos de electrónica. De feito, na conta da vítima había un total de 78 cargos de máis de medio centenar de comercios online e por diferentes importes, que ían desde 20 euros ata máis de 3.000.
A autora da suposta estafa foi detida e trasladada á comisaría da Rúa Chantada, onde quedou en liberdade con cargos, á espera de xuizo, despois de prestar declaración. Ao parecer, inicialmente, a muller non negou ter realizado as compras, pero argumentou que o marido da súa curmá —xa finado— tíñaa autorizado antes de falecer para que dispuxera dos fondos que había na conta bancaria do matrimonio.
Os investigadores da Policía Nacional puxeron os feitos en coñecemento do xulgado, onde a detida terá que defender a súa inocencia para evitar ser condenada como autora dun delito de estafa. A muller, de 60 anos de idade e veciña de Lugo, non tiña ningún tipo de antecedentes ata o momento.
PRECEDENTES. Este caso é o terceiro destas características resolto pola Policía Nacional nos últimos dous meses. A finais de agosto, os axentes detiveron a unha muller por estafarlle 50.000 euros a unha anciá e roubarlle xoias e roupa. A presunta estafadora traballaba nun negocio de estética que frecuentaba a anciá e fixéronse amigas, polo que se gañou a súa confianza.
Os axentes arrestaron a outra muller a finais de setembro por estafarlle preto de 30.000 euros a unha anciá á que levaba tan só un mes coidando. A vítima, de avanzada idade, acudiu varias veces á súa entidade bancaria para retirar "importantes cantidades" de diñeiro en efectivo, o que acabou levantando as sospeitas dos traballadores, que alertaron á Policía.
