Axentes do Corpo Nacional de Policía (CNP) detiveron este domingo na estación de autobuses de Lugo, cando xa se marchaba da cidade, ao suposto autor dun roubo con violencia, un individuo reincidente nese tipo de delitos que xa fora arrestado previamente en máis de dez ocasións.
Trátase dun mozo de 23 anos, veciño de Outeiro de Rei, pero nacido en Alacante, que conta con "innumerables antecedentes" por feitos similares.
Nesta ocasión, o roubo foi perpetrado á primeira hora da tarde, cando un mozo estaba a usar o seu móbil nas inmediacións da Estación de Autobuses de Lugo e o sospeitoso achegouse para pedirlle que lle deixase realizar unha chamada urxente.
Unha vez realizada a chamada, cando o seu propietario lle pediu que lle devolvese o móbil, o sospeitoso mostroulle unha navalla e ameazouno con ela.
Inmediatamente, o rapaz púxose en contacto cos seus pais, que alertaron á policía a través do teléfono 091.
Unha patrulla localizou ao sospeitoso pouco tempo despois no interior da estación de autobuses, cando xa se dispuña a deixar a cidade.
Os axentes cacheárono e atopáronlle o móbil que acaba de roubar, un terminal ao que xa lle había cambiado o cartón SIM para poder utilizalo co seu número.
O detido foi trasladado á Comisaría Provincial e está previsto que este luns pase a disposición xudicial.
