A Policía Local levou a cabo durante a semana do 20 ao 24 de xaneiro controles de velocidade en vías onde se detectou un incremento de accidentes de circulación e os veciños mostraran a súa preocupación porque os vehículos circulaban a altas velocidades. Durante a campaña controláronse 1.580 vehículos e puxéronse 133 denuncias.
A velocidade máis elevada captada foi de 105 quilómetros por hora nunha zona limitada a 50. Este condutor foi sancionado con multa de 600 euros e a retirada de seis puntos do carné de conducir. Mentres, na Rolda do Carme, unha das vías onde se estableceu o control, a media de velocidade captada foi de 70 quilómetros por hora, cando a máxima permitida sitúase en 50 por hora.
Doutra banda, a Policía Local tamén deu conta de que os dous condutores que se viron implicados nun accidente o pasado sábado na confluencia da Avenida de Madrid coa Rolda das Mercedes, do que informaba este luns este diario, non só deron positivo nas probas de alcoholemia, senón que case duplicaron os límites permitidos. No choque provocaron danos materiais a un semáforo. Tramitáronse expedientes sancionadores por infracción "moi grave", con multas de 500 euros e a retirada de catro puntos.
Aínda peor ía outro condutor sometido ás probas de alcoholemia o domingo pola noite, Arroxou un resultado de 0,88 e 0,81 mg/l, cando o límite é 0,25, polo que, destacou a Policía Local, instruíronse dilixencias por delito contra a seguridade viaria.
