Axentes da Policía Nacional detiveron un lucense que foi denunciado por desvalixar supostamente a casa dunha amiga que o acolleu. O home, que ten numerosos antecedentes por furto, foi detido e a Policía imputoulle ademais varias subtraccións cometidas no interior de vehículos.
Segundo explicou o portavoz policial, o presunto ladrón convivira coa vítima durante un tempo e aproveitou a súa ausencia para roubarlle un total de 500 euros e outros artigos de valor.
TURISMOS. Tras recibir a denuncia, os axentes abriron unha investigación e localizaron ao home durante a madrugada deste xoves, cando camiñaba pola Avenida das Américas intentando abrir as portas dos coches que se atopaban estacionados na vía pública. Cando o lograba, apoderábase dos obxectos que atopaba no seu interior.
A Policía Nacional impútalle ademais outro furto no interior dun vehículo que foi cometido o pasado mes de agosto. O detido, un home de mediana idade con domicilio na capital lucense, foi posto a disposición do xulgado de garda.
As pescudas para determinar os feitos delituosos levados a cabo por esta persoa foron realizadas polo Grupo II da Brigada Provincial de Policía Xudicial e pola Brigada Provincial de Seguridade Cidadá.
