O seguimento que realizaron axentes da Policía Nacional dunha condutora que circulaba de forma temeraria co seu vehículo por Lugo permitiu a detención dun suposto traficante de drogas, cuxa actividade xa xerara numerosas queixas veciñais e o inicio dunha investigación por parte da comisaría provincial. Dáse por desmantelado así un punto de venda de substancias estupefacientes.
Os feitos sucederon este mércores, cando axentes da Policía Nacional estaban a realizar labores de vixilancia no Alto de Garabolos, precisamente por mor das queixas veciñais pola presenza constante de persoas que non "eran habituais nin residentes nese barrio".
Os policías que prestaban servizo na zona viron un vehículo que circulaba a unha velocidade inadecuada, ademais de apreciar que os ocupantes ían realizando xestos pouco apropiados. Os policías iniciaron entón un seguimento dese vehículo e comprobaron que a condutora invadiu a zona peonil da Praza da Milagrosa, ademais de realizar "varias manobras impropias dunha condución normal".
De volta na zona da Medusa, o vehículo detívose e a condutora baixou para falar cun home que estaba na beirarrúa. Entón, os axentes viron que el lle facía entrega dun pequeno paquete de cor branca, á vez que ela lle pagaba cun billete.
Volveu subir ao coche e marchou do lugar, pero cando o vehículo se detivo foi interceptado inmediatamente polos policías que estaban a realizar o seguimento, que comprobaron que os ocupantes do coche estaban a prepararse para consumir unha dose de cocaína.
Por iso, procederon á identificación do suposto vendedor da droga e á súa posterior detención. O detido, con antecedentes por feitos similares, quedou en liberdade á espera de xuízo tras prestar declaración en comisaría.
