A obrigatoriedade das empresas de aplicar o control horario aos seus traballadores evidencia o pecado nacional de que se adoita esperar ao último día para cumprir co establecido. Moitas aínda non o puxeron en práctica en Lugo, nin sequera saben que mecanismo utilizarán. Esta é unha medida que incumbe a todas.
A Confederación de Empresarios de Lugo (CEL) e as empresas especializadas en desenvolvementos dixitais están a recibir "unha avalancha de consultas" de autónomos preguntando que teñen que facer e como.
A xefa dos servizos xurídicos da CEL, Lourdes Pardo, afirma que é un decreto lei "precipitado" que xera "unha chea de incógnitas" porque non ten en conta as diferentes situacións que xorden en función do tipo de empresa. "O nivel de esixencia non pode ser o mesmo para unha que teña cen empregados que para outra cun", precisa.
Pardo advirte de que coarta a "flexibilidade" que define as relacións laborais. Considera que con esta medida "legalmente" un traballador non podería cambiar de quenda cun compañeiro.
Ante o desvelo co que os empresarios acolleron esta medida, a asociación provincial de hostalería celebrará este mércores unha reunión en Lugo -que repetirá na Mariña e Monforte- para aclarar dúbidas e intercambiar criterios e experiencias. "Hai inquietude porque calquera trámite novo xera ao principio certo receo", di o seu presidente, Cheché Real.
Un dos hostaleiros que o aplica é José Manuel Cela, que ten unha ducia de empregados. Explica que leva o control manualmente. Nun folio -non existe ningún modelo oficial- aparece identificado o traballador e cada día apunta a súa hora de entrada e a de saída e firma. Ao final de mes o empregado e o empresario volven rubricar ese rexistro.
A medida afecta a todo tipo de empresarios con persoal a cargo. É o caso dos gandeiros. José Manuel López Tellado, que ten unha explotación de vacún de leite en Pol, na que traballan a quendas dúas persoas, considera que é "unha boa medida" para os empregados, pero que é "difícil de aplicar" no campo polos labores que se realizan e polo seu horario disperso. O sistema elixido é o máis recorrido, o manual, o de ir apuntando nun folio.
Outro gandeiro, Ángel López, de Guntín, que tamén o está levando á práctica cos catro empregados da súa explotación, advirte de que "cando traballas con seres vivos non podemos planificar o horario con antelación". Cre que é unha medida "sen sentido" e que se debe "lexislar desde a realidade, non desde unha cadeira de brazos".
ALTERNATIVAS TEMÁTICAS. Tanto no campo como na hostalería óptase polo rexistro manual, pero o control horario tamén se pode realizar telematicamente. As alternativas son múltiples. Unha delas é unha aplicación para os teléfonos móbiles. O empregado ábrea e actívaa á hora de entrar e á de saír e páusaa cando fai un receso para tomar un café ou o bocadillo. Tamén inclúe outros aspectos, como vacacións ou ausencias por enfermidade.
Hai outras aplicacións informáticas máis complexas que van unidas, por exemplo, a un programa de xestión de nóminas para que xa lle contabilicen ao traballador as horas extras que realiza. Ou os sistemas de xeolocalización para comerciais ou transportistas.
