Axentes do Corpo Nacional de Policía (CNP) desmantelaron dous puntos de venda de drogas na cidade de Lugo, localizados en dous pisos diferentes dun mesmo edificio na Rúa Río Cabe e sen relación aparente entre os sospeitosos, dado que uns dedicábanse a traficar con cocaína e o outro con marihuana.
Foron as queixas veciñais en relación co constante tránsito de persoas que non eran do barrio e que sempre dirixían os seus pasos a un mesmo domicilio da rúa Río Cabe as que puxeron en alerta á Policía Nacional.
Nun dos pisos foi detida unha parella, de 37 anos de idade, que se dedicaba supostamente ao tráfico de cocaína, e noutro domicilio foi arrestado outro home, de 43 anos, que presuntamente trapicheaba con marihuana.
Curiosamente, segundo informa a Comisaría Provincial de Lugo, produciuse hai só uns días unha intervención policial no domicilio da parella detida, dado que o propietario denunciara o roubo dunha gran cantidade de diñeiro.
O grupo da Comisaría Provincial encargado de investigar os delitos contra a saúde pública, puxo en marcha un dispositivo de vixilancia para "comprobar a veracidade dos feitos", dado que había sospeitas fundadas de que a parella estaba a vender droga nese piso. Ese dispositivo permitiu interceptar a un comprador de droga que levaba encima dous tipos de sustancias: marihuana e cocaína.
Como os investigadores policiais constataron que a parella sospeitosa traficaba só con cocaína, púxose en marcha unha segunda operación policial para dar co vendedor de marihuana.
As pescudas permitiron confirmar que, efectivamente, noutro piso do mesmo inmoble, un home dedicábase á venda de marihuana e haxix. As detencións producíronse o luns, o martes e o mércores desta semana.
No rexistro practicado no domicilio da parella, a Policía Nacional interveu 3.000 euros en efectivo, máis de sesenta gramos de cocaína e unha pequena cantidade de sustancia para cortar a droga. No outro piso, requisaron corenta dose de marihuana e haxix. Os detidos xa foron postos a disposición xudicial.
