A Policía Nacional desarticulou un punto de venda de droga na Avenida da Coruña e detivo un home, de 45 anos de idade e veciño de Lugo, ao que xa lle constaban 18 arrestos anteriores. Este lucense fora detido fai tan só uns días pola extorsionar a un empresario da cidade do que cobrou unha indemnización para marcharse do inmoble que lle alugou.
Os axentes abriron unha investigación tras recibir informacións por parte de veciños e comerciantes, nas que aseguraban que nunha zona da Avenida da Coruña, nas inmediacións coas rúas Ramiro Rueda, e Otero Pedrayo, estábase traficando con droga. Os cidadáns denunciaron "un movemento inusual de persoas con aspecto toxicómano e que non eran habituais da zona", cun home corpulento duns 40 anos. Segundo explicou o portavoz policial, os axentes "puxeron en marcha un dispositivo para comprobar e verificar os feitos, o cal queda constatado logo de varias semanas de vixilancias e investigacións".
Os investigadores detiveron o presunto traficante e interviñéronlle 525 euros en moeda fraccionada, e unhas trinta doses de heroína, ademais dunha bascula de precisión.
O detido prestou declaración en dependencias policiais e quedou en liberdade á espera do correspondente xuízo.
