Axentes da Policía Nacional de Lugo desarticularon un punto de venda de estupefacientes en pleno centro histórico e detiveron a catro persoas do mesmo clan familiar, unha delas menor de idade. Os axentes levaron a cabo unha intensa investigación e comprobaron que o clan utilizaba o que no argot policial coñécese como "un machuca", unha persoa á que tiñan "en estado de semiescravitude" e completamente ao seu servizo, encargándolle desde a venda de estupefacientes ata
A investigación policial iniciouse por mor das queixas presentadas por numerosos veciños, hostaleiros e comerciantes da Rúa Nova, quen denunciaron que detectaran na zona "unha constante trasfega de persoas con aspecto toxicómano". Os axentes montaron un dispositivo de vixilancia e comprobaron que, efectivamente, moitos consumidores acudían a unha vivenda desa rúa para adquirir a droga, ou se citaban cun mozo nas inmediacións para realizar a transacción. Ademais, non era a primeira vez que os investigadores interviñan nese domicilio por tráfico de estupefacientes. De feito, o xefe do clan atópase fuxido da Xustiza desde 2015, polo que foi un dos seus fillos, o maior, quen asumiu o mando da actividade delituosa.
Tras controlar os movementos dos distintos membros do clan, a Policía Nacional arrestou a unha muller -esposa do home que se atopa en busca e captura-, á súa filla, ao seu fillo maior, e á noiva deste último, unha moza de 15 anos de idade, todos eles de etnia xitana.
REXISTRO. No transcurso do operativo, os investigadores tamén realizaron un minucioso rexistro na vivenda da familia, onde foron intervidas un total de 150 dose de cocaína, unha balanza de precisión e unha bolsa de plástico que contiña recortes para realizar os envoltorios da droga e vendela polo miúdo aos consumidores.
Os axentes tamén localizaron no domicilio algo máis de 4.000 euros en efectivo e en moeda fraccionada, "procedente das vendas de droga". O clan tiña tamén no piso diferentes obxectos procedentes supostamente de roubos, como ordenadores ou material de obra, entre outros. Segundo explicou este luns o portavoz da Policía Nacional, estes artigos eran entregados polos consumidores como pago das sustancias, xa que moitos deles contan con antecedentes por delitos de roubo con forza.
LIBERDADE. Pola súa banda, tanto a nai como os dous fillos que foron arrestados teñen antecedentes por delitos contra a saúde pública. Os tres foron trasladados ás dependencias policiais da Rúa Chantada e posteriormente prestaron declaración ante o maxistrado do xulgado de garda, que decretou a súa posta en liberdade á espera de xuízo.
No operativo policial que permitiu desarticular o clan participaron os axentes do grupo encargado das investigacións relacionadas cos delitos Contra a Saúde Pública. Os veciños e comerciantes do centro histórico piden que se incremente a vixilancia policial na zona para evitar este tipo de trapicheos, sobre todo logo de ter coñecemento de que os detidos foron postos en liberdade, polo que temen que retomen a súa actividade delituosa.
