Axentes da Policía Nacional de Lugo desarticularon unha banda que distribuía droga polo miúdo por toda a capital lucense. A operación saldouse con tres detidos e a incautación de diversas sustancias estupefacientes —800 gramos de haxix e varias doses de cocaína— na vivenda dun dos arrestados, na Avenida das Fontiñas.
O operativo levou a cabo o pasado martes, cando varios axentes que realizaban labores de control de tráfico de estupefacientes observaron que se estaban realizando en varios puntos da cidade "movementos nada habituais" por parte de mozos que xa tiñan antecedentes por tráfico de sustancias ilegais.
Tal e como sinalou o portavoz policial, os axentes iniciaron unha serie de investigacións e seguimentos e interceptaron aos tres sospeitosos. Nese momento, os mozos levaban encima dous ferros de haxix e varios billetes, "froito da venda destas sustancias".
Os arrestados xa tiñan antecedentes por tráfico de sustancias ilegais
Os axentes arrestaron aos presuntos traficantes e solicitaron ao xulgado unha orde de entrada e rexistro ao domicilio dun dos mozos, no que observara movementos "estraños". Finalmente, os policías rexistraron a vivenda o mércores pola tarde e atoparon 800 gramos de haxix; varias doses dunha sustancia branca, supostamente cocaína; máis de 600 euros en moeda fraccionada; diferentes útiles empregados para o procesamiento e venda das sustancias, artigos para a súa manipulación e varios móbiles. Un dos teléfonos, valorado en mil euros, figuraba nos arquivos policiais como roubado. Os investigadores da Policía Nacional requisaron ademais os vehículos dos detidos.
ANTECEDENTES. Os tres mozos son dous veciños de Lugo e un da Coruña, de entre 25 e 30 anos de idade. Todos eles contan con antecedentes e impútaselles agora un novo delito de tráfico de estupefacientes. Ademais, a Brigada Provincial de Estranxeiría e Fronteiras abriulle expediente a un dos detidos, de orixe estranxeira, por non ter regularizada a súa estancia no país.
Tras ser arrestados, os tres mozos pasaron a noite nas dependencias policiais da Rúa Chantada da capital e posteriormente foron postos a disposición do xulgado de garda da capital lucense.
