Desaloxan unha festa sen ningunha medida de seguridade nun local de Salvador de Madariaga

A Policía Local, que contou coa colaboración da Policía Nacional, desaloxou este mércores, sobre as once e media da noite, o local La Barrica, en Salvador de Madariaga, onde preto dun centenar de persoas celebraban unha festa sen ningunha medida de seguridade.

A música do establecemento escoitábase desde a rúa e os axentes comprobaron que o propietario agochara na cociña un equipo de reprodución musical, cunha mesa de mesturas e un ecualizador, a pesar de que non ten licenza para instalalo.

Os policías comprobaron ademais que superaba o aforamento máximo permitido, xa que no interior do local había 96 persoas, cando o seu aforamento total é de 78 e actualmente só pode encher o 75%. Ademais, para gañar espazo, o propietario colocou o futbolín encima da mesa de billar.

Os axentes detectaron tamén que os camareiros non tiñan contrato e nin o persoal nin os clientes usaban máscara no interior do local, onde ademais había cabichas e un forte cheiro a tabaco.

A Policía Local desaloxou o establecemento e levantou varias actas de infracción.