jueves. 21.01.2021 |
El tiempo
jueves. 21.01.2021
El tiempo

Desaloxan un bar por abrir fóra de horario e ter clientes sen máscara e fumando

Un axente da Policía Local. ARQUIVO
Un axente da Policía Local. ARQUIVO
Un dos clientes dixo que non podía poñerse a máscara porque a perdera, polo que foi denunciado

Axentes da Policía Local de Lugo desaloxaron de madrugada un bar da capital por estar aberto fóra do horario permitido. Ademais, varios clientes non levaban posta a máscara e estaban fumando dentro do local co consentimento do propietario.

Os feitos tiveron lugar na noite do luns ao martes, sobre as dúas menos cuarto da madrugada, cando unha patrulla do Grupo Operativo Nocturno da Policía Local de Lugo observou que un bar situado na Rúa do Concello estaba aberto e había clientes consumindo, tanto no seu interior como no exterior.

Os axentes inspeccionaron o local, xa que os establecementos de hostalería e restauración teñen que pechar antes da unha da madrugada e non poden permitir o acceso de ningún cliente desde as doce da noite. Os policías comprobaron que había varios clientes fumando e que outros non facían uso da máscara de protección, polo que levantaron varias actas por infracción á normativa autonómica sobre medidas de prevención como consecuencia do covid-19.

Ademais, denunciaron o propietario do establecemento por ter o local aberto e con clientes no interior "fóra do horario establecido", así como por permitir fumar dentro do bar, onde había varias cabichas no chan, abundante fume e un forte cheiro a tabaco”.

Un dos clientes díxolles aos axentes que non podía poñer a máscara "porque a perdeu", polo que foi denunciado por infracción á Lei de Saúde de Galicia.

Desaloxan un bar por abrir fóra de horario e ter clientes sen...