Os deputados do Partido Popular polas provincias de Lugo -Joaquín García Díez e Jaime de Olano- e Ourense -Celso Delgado e Ana Vázquez- solicitaron a comparecencia do ministro de Transportes, Mobilidade e Axenda Urbana, José Luís Ábalos, no Congreso para que dea explicacións en comisión polo "absoluto abandono e desprezo" do seu departamento ás obras da A-56.
Segundo informou o Partido Popular, a intención dos seus deputados é que José Luis Ábalos compareza en comisión para informar as actuacións urxentes" que debería adoptar o Ministerio "para corrixir a flagrante situación de abandono na que se atopan os diferentes tramos de conforman a A-56", a autovía Lugo-Ourense.
Nese sentido, os populares expresaron a súa "indignación" polo "particular desprezo" que o Goberno central está a exhibir en relación con esta autovía, dado que nos Orzamentos Xerais do Estado para este ano "só figura unha ínfima consignación de 250.000 euros para o tramo Eirasvedras-Quintela" e outros 200.000 euros para o trazado entre Quintela-A Casilla e A Casilla-Cambeo.
"Non hai consignación orzamentaria algunha para os tramos lucenses", lamentan, nin sequera para "o necesario intercambiador das autovías A-54 e A-56 en Guntín".
A falta de compromiso do Goberno con esta infraestrutura ponse en evidencia, segundo o PP, "na descarada falta de respostas ás peticións de información formuladas polos representantes populares no Congreso, deixando o proxecto desta imprescincible infraestrutura no máis absoluto abandono".
