Usuarios da Rúa Anxo López Pérez, na zona centro da capital, mostraron as súas queixas polo estado que presenta a esquina do muro que pecha o recinto do seminario.
Segundo explican, o muro leva anos nun estado "lamentable" e cada vez está "máis deteriorado", polo que consideran que supón un perigo para os viandantes. Ademais, atópase situado xusto enfronte da entrada ao colexio Maristas, polo que se trata dunha zona pola que pasan a diario multitude de escolares.
Tal e como expoñen os denunciantes, varias pedras da parte baixa do muro fóronse desprendendo aos poucos. "Son pedras de gran tamaño que pesan moito. Se caen encima a un neno, pode suceder algo grave", advirten.
Viandantes e pais de escolares piden "a quen corresponda" que tome medidas canto antes para reparar a parte do muro danada. "Leva así moitísimo tempo e seguramente ninguén ten previsto reparalo, pero se pasa algo, que logo non digan non era previsible".
Os denunciantes instan tamén ao Concello a tomar cartas no asunto. "Se cadra o muro non é do Concello, pero está claro que está a provocar un problema de seguridade na vía pública, polo que algo terán que facer", conclúen.
