A Policía Local estableceu un dispositivo especial na feira de Frigsa e denunciou en seis días a 25 vehículos que non pasaran a ITV dentro do prazo establecido e a outros cinco por carecer do seguro obrigatorio. Ademais, o estado dun dos vehículos era tan lamentable que os axentes solicitaron un guindastre para que o trasladase ao depósito municipal, onde quedou inmobilizado.
Os policías tramitaron ademais outras sete denuncias por estacionamento indebido en zona de carga e descarga, seis por aparcar na parada do autobús urbano e varias máis por outros estacionamentos indebidos.
Durante os seis días que se prolongou o dispositivo –os martes e venres das tres últimas semanas de xuño– a unidade de Policía de Barrio levantou dúas actas de denuncia por infracción á Lei de Seguridade Cidadá por ocupación da vía pública sen autorización e outras dúas actas por vehículos abandonados. En total, os axentes tramitaron máis de 50 denuncias por distintas infraccións.
Segundo explicaron desde a Policía Local, o obxectivo destes controis era "garantir a seguridade cidadá, combater a venda ambulante non autorizada e controlar o tráfico no perímetro do parque de Frigsa con motivo do mercado semanal".
