Un accidente de tráfico que tivo lugar na capital lucense no que só se rexistraron danos materiais destapou a presunta estafa cometida por un axente da Garda Civil que, cando non presta servizo, dedícase a vender pólizas de seguros.
Un dos condutores implicados nese contratempo, que tivo lugar o pasado día 8 na Rúa Narciso Peinado de Lugo, atopouse coa sorpresa de que o seu vehículo carecía de seguro obrigatorio, a pesar de que o contratou co axente da Benemérita. Así llo comunicou a dotación da Policía Local, que acudiu para levantar o correspondente atestado, que o advertiu de que ía ser sancionado.
O condutor sen seguro, que é de nacionalidade estranxeira, presentou denuncia na comisaría da Policía Nacional de Lugo contra o garda civil, que nos próximos días será citado a declarar no xulgado, onde xa ten pendentes litixios por outros asuntos.
A Policía Nacional investiga agora se o axente denunciado, que está destinado a labores de vixilancia nun centro penal, puido presuntamente estafar a máis condutores. En principio non se descubriron máis casos deste tipo.
Na súa denuncia, a vítima afirmou que a finais de novembro do ano pasado se reuniu nunha cafetería do centro histórico co axente, que lle deu unha tarxeta de visita na que figuraba como asesor da área de seguros dunha empresa fincada na capital lucense, para que lle fixese a póliza do seu turismo e pagoulle 300 euros en efectivo. Entregoulle ademais copias da documentación do vehículo, do seu permiso de conducir e do seu carné de identidade.
O afectado indicou que se puxo «en numerosas ocasións» en contacto co axente, por teléfono e por whatsapp, para que lle entregase a póliza. Este respondíalle «sempre con evasivas» para non darlla. Iso si pedíalle que «non se preocupase» e garantíalle que «o vehículo estaba asegurado» e que «non había ningún problema».
A mediados do mes pasado o condutor volveulle reclamar a documentación da póliza porque tiña que realizar unha viaxe. O axente entregoulle un certificado de cobertura provisional, no que figuraban os datos da compañía que supostamente aseguraba o turismo e o selo da asociación profesional da Garda Civil á que ao parecer pertence o denunciado.
«MALENTENDIDO». Cando sufriu o accidente de tráfico, a vítima contactou telefonicamente co garda civil ao decatarse de que non tiña seguro. Este pediulle que lle pasase cun dos policías locais que estaban a realizar o atestado. O axente da benemérita explicoulle ao instrutor que fixera a póliza facía dous días e que á mañá seguinte se pasaría pola súa sede en Sanfiz para intentar «arranxar o malentendido».
Antes de presentar a denuncia en comisaría, a vítima acudiu a unha oficina da aseguradora coa que en teoría tiña contratada a póliza do seu turismo. Mostrou o certificado de cobertura provisional de que dispuña. Un mediador explicoulle que o número de rexistro que figuraba no documento «non se corresponde coa data» e que o selo que aparecía «non é da compañía», senón dunha asociación profesional da Garda Civil.
GRABACIÓN. Ademais da documentación escrita de que dispón, o denunciante tamén achegou en comisaría unha gravación telefónica na que o axente da Benemérita lle pide os datos do condutor do vehículo co que chocou para asumir el todos os gastos de reparación.
Nesa conversación gravada que achegou como proba, o garda civil asegúralle ademais á vítima que falará cun compañeiro seu para «paralizar» a denuncia que lle puxeron ao circular no seu vehículo sen seguro obrigatorio.
