A Policía Local de Lugo denunciou un home que deixou o seu can durante varias horas no interior do seu coche nun día de intensa calor. Está acusado de infrinxir a Lei de Protección e Benestar dos Animais de Compañía de Galicia.
Os feitos ocorreron o pasado 6 de agosto na rúa San Lourenzo. A Sala do 092 recibiu un aviso ás 15.20 horas alertando de que un can levaba varias horas no maleteiro dun turismo estacionado na rúa nunha xornada na que se alcanzaron os 38 graos na cidade.
Unha patrulla desprázase ata o lugar e comproba que, efectivamente, hai un can dentro do vehículo, que estaba estacionado nunha zona de sombra e con varios portelos lixeiramente abertos. A pesar diso, a temperatura no interior do coche era alta e o animal –que non tiña comida nin bebida á súa disposición– estaba visiblemente afectado pola intensa calor.
Os axentes conseguen abrir unha das portas do vehículo e liberan o animal, que mostraba dificultades para manterse en pé e que respiraba de forma axitada.
Nese momento, preséntase no lugar un home que asegura ser o propietario do can manifestando que fora a facer varios recados e que non era consciente do tempo que pasara.
Debido a que o home non portaba nese momento a documentación do animal, os axentes danlle un prazo prudencial para que poida achegala ao expediente.
Unha vez expirado o prazo, sen que o home acudise á comisaría nin respondese as chamadas telefónicas dos axentes, a Policía Local procede a confeccionar unha denuncia por non achegar a información requirida.
Ademais, o home é denunciado por ter un can de raza catalogada legalmente como potencialmente perigosa sen a licenza municipal e por omitir a inscrición do animal no Rexistro Municipal de Cans Potencialmente Perigosos.
O denunciado enfróntase a unha sanción económica entre 501 e 5.000 euros por un delito de malos tratos animais que podería implicar a retirada do can e a prohibición de tenencia de animais de compañía por un período de entre un e cinco anos.
A multa por non contar con licenza para a tenencia de cans potencialmente perigosos e non rexistrar ao animal nos rexistros oscila entre 451 e 2.700 euros.
