A Policía Local de Lugo denunciou a unha tenda de animais da capital por expor nunha vitrina para a súa venda dous cachorros de can, unha práctica prohibida pola Lei de Protección e Benestar dos Animais de Compañía de Galicia.
Unha patrulla da Unidade Territorial de Policía de Barrio acudiu a unha tenda de mascotas dun hipermercado na mañá do pasado luns, día 21, tras recibir a chamada dun cidadán anónimo denunciando que había dous cachorros de can expostos ao público nunha vitrina.
Os axentes, segundo explicou o mércores o portavoz policial, acudiron ao comercio e comprobaron que nunha "vitrina-gaiola" había dous animais, "en concreto un cachorro de bulldog francés e outro de raza pinscher". Ademais, no exterior da vitrina facíase constar o prezo de venda de cada un dos animais.
ENFERMIDADE. Os policías observaron que o bulldog atopábase "bastante delgado" e a encargada da tenda explicoulles que o animal ía ser atendido ese mesmo día por un veterinario para determinar o seu estado de saúde e precisar se necesitaba algún tipo de tratamento.
Ao día seguinte, os policías acudiron de novo ao establecemento e viron que xa soamente estaba o cachorro de pinscher. A traballadora contoulles que o outro animal estaba a recibir asistencia –supostamente por unha enfermidade do sistema dixestivo– e mostroulles un certificado veterinario que o confirmaba.
Os axentes da Policía Local de Lugo levantaron unha acta de denuncia por infracción á Lei de Protección e Benestar dos animais de compañía de Galicia, "xa que esta normativa prohibe a exhibición de animais de compañía destinados á venda en escaparates ou zonas expostas á vía pública ou a modo de reclamo", explicaron.
A citada lei prevé para os responsables destas condutas sancións económicas que poden chegar ata os 500 euros, dependendo da gravidade da situación.
