Axentes da Policía Local de Lugo denunciaron a unha usuaria do transporte público da cidade por comportarse de forma violenta cunha condutora do bus urbano que cubría unha das rutas que comunica o centro co Hospital Universitario Lucus Augusti (Hula).
Os feitos tiveron lugar o martes, 31 de agosto, sobre as 18.40 horas, cando unha patrulla da Policía de Barrio tivo que desprazarse á Rúa Ulises Romero, nas inmediacións do Hula, como consecuencia dos "problemas" que estaba a ter unha condutora do bus urbano cunha pasaxeira. A muller, de 42 anos, negábase a abonar o importe do billete e, ademais de agarrar fortemente polo brazo á condutora, golpeou repetidamente o biombo que a protexía.
Aínda que inicialmente fixo caso omiso aos requirimentos dos axentes para que abandonase o transporte e se identificase, finalmente, ante as advertencias sobre as posibles consecuencias da súa actitude, optou por obedecer as indicacións dos policías.
Aínda así, foi denunciada por sendas infraccións da Lei de Protección da Seguridade Cidadá, por causar desordes e obstaculizar o funcionamento dun servizo público e por negarse a ser identificada por axentes da autoridade.
