A defensa do exalcalde de Lugo José López Orozco xa prepara o escrito para solicitar o sobresemento da causa contra el na peza derivada da chamada Operación Pokemon que fai referencia á adxudicación do contrato do sistema ORA ao grupo Vendex.
O seu avogado, Gregorio Arroyo, recordou que a causa na que inicialmente foi imputado López Orozco na parte da citada operación, relativa á adxudicación do contrato do guindastre municipal de Lugo, xa quedou arquivada e as acusacións na peza Vendex “teñen a mesma base”, polo que opina que o resultado será o mesmo.
De feito, o letrado entende que non hai nin o máis mínimo indicio na peza de Vendex sobre a suposta comisión dun delito por parte de quen fose alcalde de Lugo durante catro mandatos consecutivos.
En todo caso, Arroyo precisou que a defensa de López Orozco non presentará a correspondente solicitude de sobresemento ata que as pezas nas que foi troceada a causa principal vaian a repartición.
Recordou que a causa principal foi dividida en “12 ou 13 pezas diferentes”, moitas das cales quedarán en Galicia, pero outras serán remitidas a xulgados de Baleares “e Cataluña”, polo que neste momento o proceso está aínda “nas pavías”.
