O presidente en funcións da Deputación e alcalde da Pontenova, Darío Campos, asegurou este mércores que mantén a súa candidatura para ser deputado e revalidar o cargo e volveu asegurar, como fixo hai quince días, que el nunca protagonizaría un martinazo, en alusión ao voto en branco do exsocialista, Manuel Martínez, que en 2015 entregou o goberno da Deputación ao PP, entón como agora a lista máis votada.
"Quero ser deputado e presidente da Deputación", reiterou Campos, quen afirmou que, se consegue ser o primeiro pero o partido aposta por que o presidente sexa o alcalde Monforte, José Tomé, el votarao. "Non vou votar a outro. Non vou facer un martinazo", asegurou. Hai un par de semanas, xa afirmaba que a situación de 2015 debe ser "irrepetible" e que non cre que ninguén o volva a facer, nin el nin outros, dixo.
O primeiro paso para presidir a Deputación é recibir o apoio dos concelleiros do partido xudicial -no caso de Campos, o da Mariña- para ser deputado. Ese respaldo foi expresado nunha reunión hai varias semanas, cando aínda non transcendera, aínda que se especulaba, con que Tomé tamén se postulaba.
O apoio a Campos e á alcaldesa de Viveiro, María Loureiro, para deputados non se explicitou con recollida de firmas, polo que Tomé, que o martes presentou os avais á súa candidatura correspondentes aos outros cinco partidos xudiciais, considera que non hai unha "proposta formal" e que xa que logo esta debe ser realizada polos "órganos do partido".
Tras a dimisión do secretario provincial e deputado en funcións, Álvaro Santos, que aspiraba a continuar como deputado e apoiaba a Campos, está á fronte do partido o secretario de Organización do PSdeG, o lucense José Antonio Quiroga, e a proposta será realizada polo PSdeG, como confirmou este.
Campos agarrábase este mércores a que ninguén lle dixo que el non vai ser deputado. "Se non contan comigo terán que comunicarmo", afirmou o alcalde da Pontenova, que se mantén firme a pesar de que xa se evidenciou que non ten apoios para presidir a Deputación. O seu rival, Tomé, conta xa con oito votos (incluído o seu) dos dez deputados que terá o PSOE, quen o martes lle acompañaron na presentación dos avais.
A última palabra sobre a lista de deputados e candidato á presidencia tena a dirección nacional do PSOE, pero neste momento as posibilidades de que Campos repita sequera como deputado son escasas. Todo apunta a que Loureiro manterase e a que lle acompañará outra muller da Mariña.
VOTACIÓNS. As votacións xa se están producindo nalgunhas demarcacións a pesar de que a comisión federal de listas non se reúne ata este xoves. Éasí porque houbo "consultas" en case todos os partidos xudiciais, o PSdeG asume os resultados e non se prevén cambios en Madrid.
