A cidade conta desde este venres con catro caniles, coa apertura do espazo acondicionado na zona verde que xa existía entre as rúas Serra de Ancares e Río Eo, á beira do Centro de Cualificación e Valoración de Discapacidades. É un recinto de 780 metros cadrados con entradas distintas para cans grandes e pequenos, con espazos separados para estes e con senllos circuítos para ximnasia canina, formados por, entre outros, elementos de corda, túneles e balancín.
"Cremos que é un dous espazos de lecer máis versátiles da capital, que favorece a convivencia con animais nun entorno amable", explicou o concelleiro de medio ambiente, Álvaro Santos, que visitou o novo canil xunto á alcaldesa, Lara Méndez.
O Concello investiu 50.000 euros nesta obra, dentro do Plan de Barrios. Méndez destacou que, para darlle un carácter sostible e minimizar o custo de mantemento, estudáronse as condicións do solar. "Tivéronse en conta factores como a orientación do predio, as temperaturas mínimas da estación, a insolación, os ventos, a exposición..., para elixir as especies a plantar e os materiais máis axeitados para o mobiliario", explicou a alcaldesa.
