O Centro Superior de Investigacións Científicas (CSIC) entregou aos viveiros Costa de Lóngaras (Lugo) e A Revolta (A Coruña) as dúas primeiras variedades de oliveira autóctona de Galicia, especies que poderán ser reproducidas e comercializadas por estes centros. Nun acto na sede do CSIC en Santiago, o delegado institucional en Galicia da entidade, Eduardo Pardo de Guevara, detallou o acordo polo que as empresas reciben un contrato de transferencia de material e licenza non exclusiva.
O contrato terá unha duración de tres anos e poderá ser prorrogado polas partes. Deste xeito, o CSIC ponse a disposición dos viveiros para a multiplicación e explotación non exclusiva das primeiras variedades de oliveira autóctona: Brava galega e Mansa galega.
As variedades Brava e Mansa galega foron recoñecidas oficialmente en outubro de 2017 tras seis anos de investigación
Á súa vez, as empresas comprométense a atribuír o rexistro das especies a nome do CSIC, que se reserva os dereitos de propiedade intelectual sobre "calquera resultado que se poida obter con estas novas variedades vexetais, entre outros aspectos".
As variedades Brava e Mansa galega foron recoñecidas oficialmente en outubro de 2017 tras seis anos de investigación. Desde hai dous anos, científicos do CSIC contan para este proxecto co apoio e financiamento da Fundación Juana de Vega. Así, Mansa e Brava convértense nas primeiras variedades de oliveira galega en ser comercializadas.
España conta cunhas 1.200 variedades de oliveira descritas, representa a maior diversidade do mundo con este cultivo e é tamén o primeiro país en superficie cultivada, concentrándose en Andalucía o 62% do total. Na comunidade galega, a existencia de oliveiras e o seu cultivo esténdese polo sur da provincia de Lugo, o sur da provincia da Coruña, e distinto puntos de Ourense e Pontevedra.
