O grupo municipal de Cs presentou "unha batería de preguntas" no Concello de Lugo ante "a demora" na comunicación entre os distintos servizos municipais no caso do bebé supostamente maltratado polos seus pais.
Cs afirma que non se explica que ese expediente chegue ao Rexistro do Concello de Lugo o día 8 de agosto e que teñan que pasar once días para que o reciba a traballadora social, feito que impide unha actuación eficaz e rápida ante casos moi graves".
Por iso, os edís de Cs pregúntanlle ao goberno local se "por mor desta grave situación" ten "previsto facer algún cambio no protocolo existente para que estes problemas non se repitan" e "para conseguir unha coordinación máis áxil entre as distintas administracións".
"Trátase dun caso moi grave e queremos que non se repita, por iso solicitamos ao goberno bipartito que tome as medidas necesarias para protexer as persoas máis vulnerables", dixo Olga Louzao.
Tamén afirmou que o goberno local ten que aplicarse para mellorar "as comunicacións entre os servizos municipais para que non volvan suceder este tipo de casos".