Un dispositivo 'made in Lugo' medirá o que contamina a industria téxtil

A diferenza do que se poida crer, a téxtil é a segunda industria máis contaminante do mundo. Así o poñen de manifesto cinco firmas galegas, tres delas lucenses, e varios equipos de investigación da USC que colaboran para desenvolver novas tecnoloxías que posibiliten verificar a sustentabilidade no sector da moda, por unha banda, controlando o impacto ambiental nas augas residuais e, por outra banda, asegurando que as fibras orgánicas ou recicladas realmente o sexan.

Este proxecto de I+D logrou fabricar un dispositivo que facilitará a recollida de mostras en fábrica e o seu envío ao laboratorio. Tamén desenvolveu unha App para android que permite realizar in situ medicións colorimétricas de compostos químicos en augas residuais. Ademais, creou un dispositivo electrónico, que unha vez instalado na saída de augas das fábricas téxtiles, permitirá monitorizar online o nivel de emisións contaminantes.

Os socios deste proxecto, denominado QC4SusTex: Autentificación e seguridade de téxtiles sostibles e desenvolvemento de dispositivos para o control ambiental efectivo na súa fabricación, son os laboratorios lucenses AMSlab e Xenotechs, especializados en análise química e bioloxía molecular, respectivamente; a compañía compostelá Mestrelab Research, experta en desenvolvemento de software; a peme coruñesa Organistry, que presta servizos de I+D a medida nos campos da química sintética e analítica, e 2xMil Sociedade Cooperativa Galega, tamén con sede en Lugo e que ofrece solucións para a xestión de empresas.

TEST VEGANO. A investigación permitiu ademais que o laboratorio AMSlab, que lidera este consorcio, incorpore ao seu catálogo de servizos dous novos tests que desenvolveu, un que garante a ausencia de produtos de orixe animal en roupa, calzado e complementos etiquetaxes baixo o estándar vegano, e outro que verifica a presenza ou ausencia de algodón modificado xeneticamente en pezas finais etiquetadas como algodón orgánico.