Barracas e grandes concertos poden quedar fóra este ano do San Froilán, unhas patronais que o Concello empezará a perfilar este xoves nun encontro da responsable de cultura, Maite Ferreiro, con axentes vinculados á celebración das festas.
Lugo celebrará o San Froilán, "mais non terá nada que ver co que estamos afeitas a gozar", advertiu Ferreiro, que recalcou que a día de hoxe non se sabe cal será a situación sanitaria en outubro, aínda que se traballa para facer as mellores festas, cumprindo as indicacións das autoridades sanitarias, sostivo.
Nun San Froilán tan atípico non está claro nin o polbo. Ramiro López e Juan Pazo Varanda, titulares de tres das casetas montadas os dous últimos anos, recoñecían este mércores que o Concello non tratou con eles do futuro das casetas e López afirmaba que nin sequera pensou aínda no San Froilán, dado que hai problemas para a reapertura da hostalería máis inmediatos, pero apuntaba que pode ser un problema que se monten as casetas "e o día 15 digan que hai un brote e que hai que pechar", xa que sería unha situación ruinosa, comentaba.
"Nas casetas fai falta meter a moita xente para que sexan rendibles e coas distancias de seguridade non hai forma de que sexa así"
Pazo Varanda apuntaba tamén á incerteza que segue marcando toda festa, incluído o San Froilán. "Este ano vai ser raro e ata pode ser un San Froilán sen polbo, porque nas casetas fai falta meter a moita xente para que sexan rendibles e coas distancias de seguridade non hai forma de que sexa así", advertía. Se o aforamento non pode ser o doutros anos, habería que revisar todo, desde os prezos a pensar outro tipo de instalacións, dicía.
Os barraquistas viven tamén na incerteza. Teñen interese en montar as atraccións, especialmente tras un ano que está a ser ruinoso, pero aínda non falaron co Concello.
"Iremos falar con eles e presentaremos as medidas de seguridade que estamos a preparar", explicaba o responsable do Saltamontes, unha das atraccións con máis tirón das festas. "Un San Froilán sen barracas non sería San Froilán", opinaba.
"Queremos que o San Froilán siga sendo a gran festa do outono galego, mais tamén garantir a seguridade"
REUNIÓN. En tanto, Ferreiro terá un encontro virtual este xoves con colectivos vinculados ao San Froilán para recoller as súas propostas e explicar as medidas nas que traballa o Concello.
Dixo que o obxectivo é lograr unhas festas seguras e nas que poidan participar todos os veciños de Lugo. A reunión, prevista para as 18.00 horas, emitirase en directo na conta de Facebook da concellaría.
"Queremos que o San Froilán siga sendo a gran festa do outono galego, mais tamén garantir a seguridade", afirmou Ferreiro, que animou os lucenses a asistir á reunión virtual e achegar as súas ideas para conservar as festas.
