O Servizo Galego de Saúde comunicou este luns dez novos falecementos de persoas que foran diagnosticadas de coronavirus e que pereceron nos últimos días en Galicia. Tres delas morreron no Hula, co que o saldo de vítimas do covid na provincia desde que comezou a pandemia ascende xa a 229, aínda que o Sergas contabiliza 221 ao non incluír algúns decesos de lucenses ocorridos noutras provincias.
Os últimos óbitos notificados correspóndense cunha muller de 89 anos e un home de 79 que faleceron este domingo 1 de agosto no Lucus Augusti e cun home de 85 anos que feneceu este mesmo luns tamén no hospital lucense. Os tres tiñan patoloxías previas.
BALANCE DIARIO Descenden os casos activos en Lugo e os contagios baixan do milleiro en Galicia
En total, as dez defuncións notificadas a última hora deste luns por Sanidade elevaron a 2.474 os falecidos en Galicia por mor da pandemia desde o seu inicio no primeiro trimestre de 2020. Os decesos, ningún deles relacionado con centros sociosanitarios, non corresponden todos a esta xornada, na cal si se computaron tres: ademais da dun home de 85 anos no Hula, tamén faleceron unha muller de 91 no Hospital do Salnés e unha muller de 81 no Complexo Hospitalario Universitario de Pontevedra (Chup).
O domingo, ademais dos dous falecidos do Hula, morreron tamén dous homes de 94 anos no Complexo Hospitalario Universitario de Ferrol (Chuf) e un home de 87 no Hospital do Salnés. Un día antes, o 31 de xullo, faleceu unha muller de 95 anos no Chup e o 30 unha muller de 93 no Complexo Hospitalario Universitario de Santiago (Chus).
Todas estas persoas presentaban patoloxías previas, segundo sinala este departamento autonómico.