A fotografía da incidencia do coronavirus en Lugo segue invariable. O balance facilitado polo Sergas este domingo reflexa 17 casos activos, os mesmos que o sábado, dos que só un se atopa hospitalizado no Hula. O resto recupéranse nos seus domicilios.
Desde o inicio da pandemia na provincia rexistráronse 28 mortes e 921 curacións.
GALICIA. O número de contaxiados activos por coronavirus en Galicia sitúase este domingo en 340, o mesmo que que este sábado, dos que 4 están hospitalizados e o resto (336) están nos seus domicilios.
Ademais, non hai persoas ingresadas na Uci por esta enfermidade e un día máis non faleceu ningunha persoa, co que seguen sendo 619 mortos desde o inicio da pandemia.
A Dirección Xeral de Saúde Pública da Consellería de Sanidade informa de que 109 casos pertencen á área da Coruña, 17 á de Lugo, 24 á de Ourense, 8 á de Pontevedra, 140 á área de Vigo, 28 á de Santiago e 12 á de Ferrol.
Segundo a Xunta, en Galicia hai 10.530 persoas curadas e realizáronse 165.608 probas PCR. En canto ás residencias de maiores, nesta xornada hai catro usuarios afectados e un profesional.
