A federación de asociacións de veciños de Lugo Lucus Augusti denunciou as condicións nas que están algunhas zonas próximas á muralla romana que se poden ver desde o paseo do adarve do monumento. O colectivo refírese en concreto á zona próxima ao aparcadoiro ao aire libre situado cerca do hospital Virxe dos Ollos Grandes, pasando pola porta do Bispo Odoario, xa que considera que ao existir restos arqueolóxicos deberíanse respectar e coidar. Tamén sinalan o solar do Pazo de Dona Urraca como un dos puntos nos que se debería retirar a maleza, así como algúns outros próximos.
Os veciños remarcan a importancia de que estas zonas se vexan impecables, debido á mala imaxe que dan actualmente aos veciños e turistas que chegan á cidade.
O problema da maleza é un dos máis recorrentes na cidade de Lugo. Os veciños de múltiples barrios quéixanse do deixamento que presentan algúns puntos da capital
Este mesmo mércores a plataforma Lugo de Cara ao Miño organizou unha camiñada de custodia e recoñecemento do río e das súas ribeiras ao seu paso pola cidade. A camiñada centrouse na zona das Saamasas e o contorno do Club de Piragüismo e a fábrica da luz. Na camiñada puideron comprobar o pésimo estado que presentan sendas e pontes de madeira, así como o deixamento absoluto que rodea a fábrica da luz.
Con este tipo de actividades preténdese denunciar a situación de abandono das beiras do Miño, non só por cuestións estéticas, senón tamén de seguridade. O pasado mes de xuño un home de 84 anos caeu por un pequeno desnivel e quedou atrapado entre a vexetación nas inmediacións do Balneario.
Pero o Miño e a súa contorna non son o único punto problemático da cidade. Os veciños e condutores tamén protestaron en máis dunha ocasión polo estado dos beiravías da Estrada Vella de Santiago, onde a maleza creceu de tal forma que incluso tapa algúns dos sinais de tráfico e invade curvas.
SOLUCIÓNS. Aínda que nalgunhas zonas o estado da vexetación segue sendo lamentable, noutras o Concello de Lugo puxo en marcha as brigadas municipais de limpeza para retirar a maleza.
Un exemplo é a roza que se levou a cabo nun dos principais accesos da cidade, A Fervedoira, onde a vexetación dificultaba a visibilidade dos sinais e as curvas.
Tamén se procedeu á limpeza dun solar da rúa Primavera onde a maleza chegou a tal punto que se proxectaba sobre os coches aparcados.
