O Club Fluvial mantén aberto o prazo para apuntarse aos cursos de piragüismo durante a segunda quincena deste mes e a primeira de setembro. Ata o momento, máis de 60 persoas pasaron este verán xa por esta actividade, que leva dezanove anos organizándose e que está aberta a todos os lucenses maiores de 8 anos.
Cada día hai clases para varios grupos de dez ou quince persoas, dependendo das idades. Para inscribirse, é necesario saber nadar e poder remolcar unha piragua a 50 metros da beira. Todos aqueles interesados deberán acudir ás oficinas do Club Fluvial para encher a correspondente solicitude e achegar a documentación necesaria co fin de realizar, entre outros trámites, a solicitude da licenza federativa dado que algúns cursillistas poderían chegar a incorporarse ao equipo da entidade.
O Club Fluvial sinala que esta actividade é perfectamente compatible coa pandemia de Covid-19 dado que é unha disciplina que se practica ao aire libre e tanto nas embarcacións K-1 como K-2 mantéñense as distancias dun metro e medio.
Aínda así, tamén se cumpre todo o protocolo de desinfección. De feito, unha vez que conclúe cada curso, o material empregado é limpado e desinfectado, o que tamén contribúe a garantir en todo momento a seguridade de todos os usuarios.
