O Instituto Galego de Consumo emitiu unha resolución pola que a operadora de telecomunicacións R deberá abonar a un cliente unha compensación de 20 euros mensuais durante un ano (240 euros en total) por eliminar do servizo contratado a emisión dos partidos da Segunda División de fútbol (Liga Smartbank).
Diso informou a asociación de consumidores Facua Galicia, encargada de xestionar a reclamación por parte do cliente, veciño de Lugo, que contratara os servizos da operadora cunha oferta que, entre outros servizos, incluía a emisión dos partidos da categoría de prata do fútbol español.
Con todo, explica a asociación, durante os primeiros meses do inicio da competición na tempada a operadora informou ao seu cliente que xa non dispuña dos dereitos de emisión dos partidos de Segunda pero lle ofrecía a opción de contratar por 19,99 euros a subscripción a unha plataforma (MiTele Plus, propiedade de Mediaset) que acababa de facerse co servizo para a súa distribución en exclusiva desta competición.
Ante esta situación, o cliente solicitou unha compensación á operadora por valor dos 20 euros mensuais que custaba o paquete de partidos. Tras ser rexeitada a súa petición, acudiu a Facua, que tramitou a reclamación ante o Instituto Galego de Consumo.
Finalmente, a entidade encargada da arbitraxe resolveu que R debe abonar a este cliente os 240 euros como compensación "por incumprimento contractual, ao excluír a prestación da canle de liga".
"A tenor do disposto no artigo 1.101 do Código Civil procede a compensación ao reclamante na cantidade de 20 euros ao mes durante o prazo de doce meses", sinala o laudo arbitral, segundo recolle o comunicado da asociación de consumidores.
