A Confederación Hidrográfica ten en marcha unha campaña de corta de árbores nas marxes do Miño en Lugo, augas arriba da escola de Piragüismo e anunciou que a partir do martes acoutará un espazo duns 500 metros para iniciar a retirada das árbores. Sacaranse a través da propia canle, polo que se prohibirá durante varios días o uso dese tramo do río para a práctica deportiva.
A Confederación apuntou que o obxectivo é a "limpeza e retirada de árbores caídas e decrépitas", na marxe esquerda do Miño, augas arriba da ponte nova. Nun tramo do río os arrastres realizaranse desde a mesma beira mediante cableado e as árbores trasladaranse dunha marxe do río á outra a través da canle pola dificultade do acceso.
