Os atascos concentráronse este martes sobre todo entre as oito e media e as nove e cuarto da mañá, o que desencadeou unha sucesión de queixas de condutores, que chamaron por teléfono ao Concello e á Policía Local para expresar o seu malestar.
As obras que se están acometendo na Ronda da Muralla, á altura da Porta de Santiago, para ensanchar a beirarrúa máis próxima ao monumento romano provocaron que desde o luns pola tarde estea cortada ao tráfico a Rúa Cidade de Viveiro, polo que os vehículos que se dirixen ao centro son desviados pola Rúa Santiago.
Ese corte propiciou que se rexistrasen retencións na Ronda da Muralla e na Rúa Santiago, así como en vías alternativas como a Ronda do Carme.