A Policía Local de Lugo denunciou a un condutor que circulaba de madrugada pola Rúa dos Gardas, no barrio da Milagrosa, baixo os efectos de bebidas alcohólicas.
Os feitos sucederon na noite do luns ao martes, cando os axentes instalaron un filtro de seguridade viaria e observaron que un condutor "presentaba signos de embriaguez", polo que lle deron inmediatamente o alto.
Os policías someteron ao home ás probas de alcoholemia, nas que arroxou un resultado de 0,49 miligramos por litro de aire expirado, case o dobre do permitido.
Os axentes inmobilizáronlle o vehículo e abríronlle un expediente sancionador pola vía administrativa, que carrexa unha multa de 500 euros e a retirada de catro puntos de permiso de condución.
A Policía Local de Lugo realizou esa mesma noite outros controis de seguridade viaria en diferentes puntos do centro urbano, sen que se detectasen positivos nas probas de alcoholemia nin no test de sustancias estupefacientes.
