Os acusados acudiron á vivenda da denunciante o 15 de xullo de 2019 para cobrar unha presunta débeda que tiña a empresa do seu esposo. Os dous homes detiveron o seu coche -un Ford Festa cos rótulos: Cobro de morosos e A funeraria do cobro- e empezaron a pitar coas luces intermitentes acesas e a música a todo volume.
O coche estivo parado deste xeito diante da vivenda durante máis de hora e media, ata que a muller saíu cara á cancela da súa leira e pediulles que se marchasen, xa que se non chamaría á Garda Civil. Nese momento, un dos acusados comezou a rirse e díxolle: "Chámaa, chámaa". Acto seguido, os acusados estacionaron o seu coche diante da cancilla do veciño de en fronte e o home pediulles que se fose de alí, ao que lle responderon se el non debía nada. Os acusados xa estiveran fronte á vivenda da muller uns días antes, facendo fotos e insultándoa.
Os homes afirmaron no xuízo que acudiron á casa a notificarlle unha débeda e que o encontro foi "cordial", pero o xuíz deulle maior credibilidade aos testemuños da muller e dos seus veciños.
