O xulgado do Penal número 2 de Lugo condenou a un mozo por acosar a unha descoñecida durante polo menos catro meses e impúxolle unha multa de 2.250 euros. Ademais, o acusado non poderá achegarse á moza nin comunicarse con ela por ningún medio durante dous anos.
Segundo explica a sentenza, a partir do mes de setembro de 2016, "sen motivo aparente", o acusado comezou a seguir a unha moza cada vez que ela saía do seu domicilio. A moza empezou a sentirse incómoda porque o acusado facíase "o encontradizo" e perseguíaa cada vez máis de cerca. Ademais, entraba en todas as tendas ás que ela accedía e estaba dentro ata que a moza marchaba. Nunha ocasión, segundo explicou a acusación, o home "chegou a pegar a súa cara á dela a escasa distancia".
A moza -que cando sucederon os feitos tiña 25 anos, cambiou de hábitos para evitar o denunciante, pero o home seguiuna acosando incluso despois de que a vítima decidísese a contar o que lle estaba pasando e a denunciar os feitos ante a Policía.
Tal e como explica o fallo, esta situación provocoulle á moza "un gran nerviosismo e intranquilidade, polo que procuraba non saír soa -especialmente polas noites-, volver a casa en taxi, ou utilizar zapatillas ou calzado sen tacóns para poder fuxir en caso de atoparse pola rúa co acusado".
O home non se presentou ao xuízo que se celebrou no Penal número 2 da capital lucense, pero posteriormente recorreu a sentenza condenatoria, aínda que foi confirmada pola Audiencia Provincial de Lugo.
