Quedar sen televisión non é unha cuestión de risco vital. E por se a alguén quedaba algunha dúbida, a xuíza do Penal número 1 de Lugo condenou a un home que se saltou a prohibición de entrar na capital co único obxectivo de recuperar a súa tele, xa que, segundo dixo, lla ían"a roubar".
A maxistrada conclúe que o home vulnerou a orde de afastamento, "non existindo risco vital e non pedindo autorización xudicial nin permiso de entrada", polo que lle impón unha multa de 2.160 euros.
Na vista oral -celebrada o pasado 26 de setembro-, o home admitiu que acudiu á capital lucense sobre as once da noite do 18 de marzo de 2018. "A miña exmuller alugoulle unha habitación do noso piso a unha señora, que me chamou un día e díxome que un mozo quería levar a miña televisión. Eu non mo pensei dúas veces, collín un taxi desde Palas de Rei, onde estaba a vivir, e planteime na miña casa a levarme a miña tele", dixo.
O acusado recoñeceu que "sabía perfectamente" que tiña prohibido entrar no municipio, pero dixo que esa prohibición era para non achegarse nin comunicarse coa súa exmuller -que o denunciou- e que pensaba que "non pasaría nada" por recoller as súas pertenzas. "Eu non tiña nin o máis mínimo interese en vela nin en falar con ela; só quería recuperar o meu. Se non vou naquel momento quedo sen televisión. Non era a miña intención quebrantar a orde de afastamento", dixo.
O ministerio fiscal alegou que o acusado desatendeu ao xuíz de forma intencionada e solicitou que fose condenado por un delito de quebrantamento de medida cautelar. A súa defensa, con todo, pediu a libre absolución do acusado, ao entender que non houbo intencionalidade na súa conduta e que nin tan sequera foi algo premeditado, "senón que o chamaron para dicirlle que lle ían a roubar a televisión e, xusto nese momento, trasladouse a Lugo para recollela sen outra pretensión".
DELITO. A titular do Penal número 1 de Lugo explica na sentenza que o 21 de febreiro de 2018, o xulgado de Instrución número 3 de Lugo impúxolle ao acusado "a prohibición de residencia, entrada e permanencia no termo municipal de Lugo, agás no caso de risco vital ou naqueles casos nos que, de forma inexorable, debese acudir a Lugo, pedindo neste último suposto a debida autorización xudicial".
A xuíza conclúe que o acusado non estaba en ningún destes supostos, polo que cometeu, de forma totalmente consciente, un delito de quebrantamento de medida cautelar, "considerado como un ataque á efectividade dos pronunciamientos da autoridade xudicial, pois o que se pena é a desobediencia a mandatos do sistema xudicial que pola súa propia natureza son públicos e obrigatorios", expón.
Deste xeito, a maxistrada condena ao home polo citado delito e imponlle unha pena de doce meses multa cunha cota diaria de 6 euros, o que suma 2.160 euros, unha cantidade suficiente para que o acusado compraría outro televisor sen incorrer nun delito.
