O xulgado Penal 2 da capital lucense condenou un mozo que arrincou a patadas os espellos retrovisores de tres coches que estaban aparcados por simple diversión. A xuíza condénao pola maior pena que lle era posible, un delito de danos, e imponlle seis meses de multa a dous euros diarios, coa responsabilidade dun día de privación de liberdade por cada cota non paga. O rapaz deberá pagar ademais todas as costas procesuais e indemnizar os propietarios dos vehículos cuns 540 euros.
No xuízo, en principio, sentaron como acusados tres mozos, que foron identificados pola Policía como os supostos autores dos danos a tres coches que estaban aparcados de noite na rúa Tui. Con todo, os axentes recoñeceron na vista que no momento de ser identificados os tres rapaces coincidiron en que só un deles era o autor das patadas aos retrovisores. Unha versión que os outros dous confirmaron no xuízo, pero non así o que finalmente resultou condenado, xa que nin sequera se presentou.
A xuíza, con todo, non só non dubidou en condenalo, senón que considerou que era merecedor do maior dos reproches penais que se podía impoñer xa que se daban todos os elementos para iso: estaban probados os danos; estes eran maiores de 400 euros e ademais existía no comportamento do mozo a "intención de danar" cun evidente menosprezo pola propiedade allea.
O ministerio fiscal solicitaba en principio no seu escrito de acusación unha pena de 18 días de multa, pero finalmente a xuíza decidiu que a súa conduta merecía unha condena de seis meses de multa.
