O xulgado de menores de Lugo condenou a un adolescente por esnaquizar a lúa dianteira dunha escavadora cunha barra de ferro e ameazar ao condutor da máquina con matar ao seu fillo no colexio.
O xuíz impuxo ao mozo unha pena de seis meses de liberdade vixiada, "coa regra de conduta consistente na obrigación de realizar actividades sobre a resolución pacífica de conflitos e o respecto aos demais". Así mesmo, os pais do mozo terán que asumir a reparación do cristal, que foi fixada en 1.743 euros, incluídos os danos e os intereses legais correspondentes. A sentenza recolle que o 28 de outubro de 2018 —entre as seis menos cuarto e as seis e media da tarde— o pai do menor iniciou unha discusión con outro home que estaba a realizar tarefas de conservación de estradas cunha máquina escavadora, supostamente por unhas desavinzas en relación cunhas ramas.
Nun momento do altercado, o menor —que naquel momento tiña 15 anos de idade— colleu unha barra de ferro que portaba o seu proxenitor na man e comezou a golpear con forza o cristal dianteiro da máquina escavadora, ata que o esnaquizou. Ademais, achegouse ao condutor e díxolle: "Mañá vouche matar ao teu fillo non colexio".
DEFENSA. O afectado denunciou os feitos ante a Garda Civil e o caso acabou no xulgado de Menores. O mozo negou que o altercado se producise como explicou o denunciante e o seu avogado solicitou a súa libre absolución, pero, tras examinar as probas, o xuíz considerou probado que o menor "actuou directamente contra o cristal da máquina co pau que lle arrebatou ao seu pai, e posteriormente ameazou con facerlle dano ao fillo do denunciante, que acode ao mesmo colexio".
Deste xeito, condenou ao mozo como autor dun delito de danos e un delito leve de ameazas. O mozo non tiña ata o momento outros expedientes abertos.