A Audiencia Provincial de Lugo condenou a un pai a seguir mantendo durante 18 meses á súa filla de 27 anos por habela maltratado e haberlle causado unha "grave patoloxía psicolóxica".
Aínda que o pai conseguira en primeira instancia que a Xustiza extinguise a obrigación de seguir pasándolle a manutención, unha sentenza da Audiencia Provincial de Lugo datada en xuño, á que tivo acceso Efe, estima parcialmente o recurso de apelación exposto pola moza.
Nesa sentenza, na que figura como relatora o propio presidente da Audiencia Provincial de Lugo, José Antonio Varelo Agrelo, faise referencia ao "ditame pericial moi contundente" que presentou en sede xudicial a psicóloga que durante tres anos tratou á demandante "sobre a súa grave patoloxía psicolóxica", consecuencia do "dano ou trauma causado polos malos tratos psicolóxicos" ao que foi sometida polo seu propio pai.
Segundo ese informe, esa mesma patoloxía "dificulta as súas relacións, a súa concentración e, en definitiva, a súa aptitude para o traballo".
"Non pode obviar", engade, que o pai "parece ser en boa medida o responsable" das "dificultades psíquicas da súa filla"
Tamén recorda a resolución da Audiencia que se constatou a través dunha sentenza penal firme a condena do pai por malos tratos, tanto á súa esposa como á súa filla” e considera "razoable o nexo causal" entre eses malos tratos "e as patoloxías psicolóxicas que padece a vítima".
Recoñece, en todo caso que "non pode obviar que a filla, de 27 anos, non puido ou non soubo aproveitar a oportunidade de estudar Psicoloxía en Madrid", porque a súa etapa universitaria foi "certamente deficiente", e a "alternativa laboral" tampouco foi "afrontada con éxito", porque "nestes anos unicamente constan como traballados, polo menos con cotización oficial, once días".
Por iso, a sentenza subliña que aínda que existen datos que permiten "avalar a extinción da pensión", tamén "resulta xustificado establecer un tempo prudencial de adaptación á nova situación".
"Non pode obviar", engade, que o pai "parece ser en boa medida o responsable" das "dificultades psíquicas da súa filla", polo que resultaría "ilóxico premiar esa actuación" coa "extinción" da manutención.
Por iso, a sala opta por manter a pensión durante dezaoito meses para "dar á demandada o seu período de adaptación á nova situación", salvo que a moza acceda antes ao mercado laboral.
