O xulgado do Penal número 1 de Lugo impuxo unha condena de 9 meses de prisión a un home que agrediu á súa noiva de madrugada nunha ruela, golpeoulle con forza a cabeza contra a parede e deixouna tirada no chan inconsciente.
A sentenza explica que o 7 de outubro de 2017, ao redor das tres da madrugada, a parella discutiu no interior dun local de copas situado na cale Pintor Luís Seoane, na capital lucense, e o encargado do pub díxolles que tiñan que abandonar o local.
Unha vez fóra, -nunha ruela próxima á rúa Serra de Ancares- o acusado agarrou por pescozo á súa compañeira sentimental de forma repentina e golpeoulle a cara contra a parede. A muller caeu ao chan de xeonllos “e quedou un intre inconsciente”, pero a pesar de ver que non se movía, o home marchouse rapidamente do lugar e deixouna alí tirada, sen pedir asistencia médica.
Cando recobrou o sentido, a vítima tivo que acudir a un hospital e diagnosticáronlle un hematoma “importante” no ollo dereito, así como diversas feridas no nariz e no beizo inferior. A muller non sufriu ningunha fractura e tardou nove días en recuperarse por completo das lesións.
Ler máis: Un total de 183 nenos naceron durante o estado de alarma en Lugo
Tras a agresión, o xulgado de instrución número 3 de Lugo ditou unha orde de protección e impúxolle ao agresor a prohibición de aproximarse á vítima a menos de 500 metros e de comunicarse con ela por calquera medio.
Finalmente, o home foi xulgado no Penal 1 de Lugo como autor dun delito de malos tratos non habituais no ámbito da violencia de xénero e a xuíza que se ocupou do caso impúxolle unha condena de 9 meses de cárcere. Ademais, foi condenado a dous anos de afastamento da vítima.
O acusado recorreu a sentenza, pero a Audiencia Provincial de Lugo confirmou que había probas suficientes para enervar a presunción de inocencia e confirmou o fallo, que xa é firme.
