O xulgado do Penal número 1 de Lugo condenou este xoves a un home, con iniciais C.G.O., acusado de empuxar a un policía por unha escaleira ao fuxir dun control. Os feitos sucederon o 16 de decembro de 2017, sobre as tres menos cuarto da madrugada, cando unha patrulla da Policía Local deulle no alto a un condutor nun control de alcoholemia.
O home baixouse do coche e deuse á fuga, pero os policías seguírono a pé ata unhas escaleiras da Calzada da Ponte. Unha vez alí, o acusado enfrontouse a un dos policías, que caeu polas escaleiras e sufriu múltiples contusións nas costelas e nos xeonllos.
O ministerio fiscal solicitaba inicialmente unha condena de seis meses de prisión e 360 euros de multa, pero o acusado recoñeceu os feitos e as partes chegaron a un acordo para rebaixar a pena, polo que non se celebrou o xuízo.
