O Xulgado do Contencioso-Administrativo número 2 de Lugo condenou ao Concello de Lugo, nunha sentenza que o sindicato CSIF cualificou como "pioneira", a indemnizar a un policía local que foi agredido nas patronais de 2014, despois de que o Xulgado do Penal condenase ao agresor a resarcilo polas súas lesións, pero este fose declarado "insolvente".
O sindicato recorda que, no ano 2014, o funcionamento das comunicacións na Policía Local "era moi deficiente" e esa situación provocaba "serios riscos para a integridade física dos policías que patrullaban as rúas de Lugo", como a propio CSIF denunciou no seu momento.
Nunha desas actuacións, concretamente durante as festas patronais de San Froilán, aclara o sindicato, "un policía sufriu diversas lesións durante a detención dun individuo violento" e "outros compañeiros" non puideron "acudir na súa axuda" polo mal funcionamento do sistema e dos equipos de comunicación.
No xuízo correspondente, o agresor foi condenado, entre outras penas, a indemnizar o policía agredido polas lesións sufridas. Con todo, o axente nunca chegou a percibir esa cantidade, porque o procesado foi declarado insolvente.
Como "a xurisprudencia do Tribunal Supremo establece un principio de indemnidade dos empregados públicos, en virtude do cal a Administración debe resarcilos por todos os danos que sufran no exercicio das súas funcións, sempre que non incorran en dolo ou neglixencia grave", aclara o sindicato, o policía acudiu á asesoría xurídica do CSIF para reclamar ao Concello a contía da indemnización fixada polo xuíz.
Con todo, a administración local "nin sequera se dignó en contestar" e, aínda que o axente "reiterou a súa solicitude", o "Concello ignorouna por completo".
Finalmente, acudiu ao Xulgado do Contencioso-Administrativo número 2 de Lugo, que acaba de ditar sentenza condenando ao Concello a abonarlle a indemnización establecida no seu día pola xurisdición Penal, ademais dos intereses correspondentes e as costas xudiciais.
"Esta sentenza obtida por CSIF é unha sentenza pioneira no Concello e senta un precedente moi importante para calquera empregado municipal, xa que en diante calquera traballador que, no exercicio das súas funcións, poida ser obxecto de calquera tipo de agresión terá a garantía de que non quedará sen ser resarcido economicamente polos posibles danos" que sufra, explica.
O sindicato tamén precisa que afecta "non só a policías", senón tamén "a funcionarios dos Servizos Sociais, do albergue municipal, funcionarios cuxo posto está en atención ao público ou bombeiros", entre outros.
