A defensa de Francisco Javier Belda confirmou que a súa intención co recurso contra a sentenza da Audiencia Provincial de Lugo que o condenou a 23 anos de cárcere o asasinato, no barrio das Gándaras, de Clara María Expósito, é "rebaixar un pouco máis a pena" para o seu defendido.
En declaracións a Efe, o avogado que exerce a defensa, o lucense Jacobo Vázquez, explicou que, "en base aos feitos" e á proba practicada no transcurso do xuízo oral, esa pena podería quedar rebaixada "a vinte anos de cárcere", "a mínima" establecida para o tipo penal polo que foi condenado o seu patrocinado.
O próximo día 12 de decembro terá lugar a vista oral no Tribunal Superior de Xustiza de Galicia por ese recurso de apelación que interpuxo a defensa e a cuxa estimación xa se opuxo a Fundación Amigos de Galicia no seu momento, en exercicio da acusación popular polo asasinato desta veciña de Lugo.
Agora, o colectivo afirma que o recurso interposto pola defensa "limítase a discutir o alcance da pena privativa de liberade individualizada pola presidenta do tribunal, que esta parte estima efectuada con toda corrección e con escrupuloso respecto das regras que establece o noso Código Penal".
