O xulgado do Penal número 2 de Lugo impuxo unha condena dun ano de prisión a un home —con iniciais S.G.J.— que entrou nun domicilio particular do municipio lucense e foi pillado "in fraganti" polo irmán do propietario cando roubaba xoias.
O xuíz considera probado que o 6 de xuño de 2014, ao redor das once da mañá, o acusado entrou nunha vivenda unifamiliar tras saltar o muro de peche da leira. Unha vez dentro, forzou unha fiestra da primeira planta cun desaparafusador e accedeu ao interior da casa.
O ladrón percorreu varias estancias e foi depositando todas as xoias que atopaba encima da cama dun dormitorio, onde foi sorprendido polo irmán do dono. Ao darse conta de que o viron, o acusado levantou as mans e emprendeu a fuxida pola porta principal, deixando encerrado ao home.
No seu escrito de conclusións provisionais, o ministerio fiscal alegaba que, tan só tres días máis tarde, tamén sobre as once da mañá, o ladrón conseguiu entrar noutro domicilio. Unha vez máis, buscou xoias e foinas xuntando encima dunha cama coa intención de levarllas, pero o dono da casa, que estaba no soto, escoitou ruídos e subiu rapidamente ao dormitorio. Ao velo, o ladrón levantou as mans e dixo: "Vale, vale, vale".
Acto seguido, o acusado deuse á fuga pola porta principal da vivenda, que tiña as chaves postas na fechadura, e aproveitou esa circunstancia para deixar ao home encerrado no interior. Con todo, a sentenza do Penal número 2 considera probado unicamente o roubo cometido o 6 de xuño.
RECURSO
O acusado negou en todo momento os feitos e dixo que xamais estivera na vivenda do denunciante. Ademais, o seu letrado recorreu a sentenza porque no ateigado policial faise referencia a uns feitos ocorridos o 6 de maio, e non en xuño.
A Audiencia Provincial admitiu o recurso de apelación e revisou o caso, pero concluíu que se trata unicamente dun "erro mecanográfico" que non creou ningún tipo de indefensión ao investigado, "que era coñecedor dos feitos denunciados e polo que era interrogado". Deste xeito, o tribunal lucense confirma a condena dun ano de prisión, imposta polo xulgado do Penal número 2 de Lugo, polo que o fallo xa é firme.
DILACIÓNS INDEBIDAS. O maxistrado considerou que tamén concorría a atenuante de dilacións indebidas, xa que os feitos foron en 2014. O fiscal pedía unha condena de dous anos de cárcere.