O xulgado do Penal número 2 de Lugo impuxo unha condena de dous anos e tres meses de prisión a un lucense acusado de abordar á súa muller na cama e propinarlle varias puñadas na cabeza. A sentenza –que foi recorrida e ratificada pola Audiencia Provincial– prohibe que o home se achegue ou se comunique coa vítima por un período de cinco anos e tres meses.
O xuíz considera probado que a parella mantivo unha relación sentimental "análoga á matrimonial" durante doce anos, convivindo no mesmo domicilio e chegando a ter un fillo en común. No transcurso desa convivencia, concretamente sobre as oito da mañá do 31 de xaneiro de 2019, o acusado achegouse á súa parella e propinoulle varios golpes.
O xuíz recolle no fallo que o home, sen manter ningún tipo de discusión previa, aproximouse á súa muller, que estaba deitada na cama, e comezou a golpeala co puño na cabeza. Ademais, mentres a golpeaba, lle dixo varias veces que ía coller un coitelo e que a ía a matar. Por mor deste episodio, a muller sufriu varias contusións na cabeza e tivo que recibir asistencia médica. A sentenza explica tamén que, uns días antes destes feitos, o acusado discutiu coa súa parella e comezou a recriminarlle que estivera "con outro home". O acusado foise alterando cada vez máis e acaboulle propinando varias labazadas á súa muller. Nesa ocasión, a vítima non acudiu ao médico.
O acusado, que non se poderá achegar á vítima durante cinco anos, non se presentou á vista oral, que se celebrou na súa ausencia
O agresor foi denunciado e o titular do Penal número 2 de Lugo condenouno como autor de dous delitos de malos tratos no ámbito familiar e outro delito de ameazas, polo que lle impuxo unha pena de 9 meses de prisión por cada un. O acusado non se presentou ao xuízo e o letrado da defensa recorreu a condena alegando que non podería ser xulgado en ausencia porque a pena solicitada para el superaba os dous anos de prisión. Con todo, a Audiencia rexeitou o seu argumento, "xa que han de entenderse as penas individualmente consideradas, non a suma das mesmas", explicou.
A defensa solicitou tamén que lle recoñecesen ao agresor a atenuante moi cualificada de anomalía psíquica, pero a sala conclúe que o home está diagnosticado dun trastorno "sen repercusión na súa capacidade cognitiva" e que "non afecta á súa capacidade de entender". En calquera caso, o xuíz xa lle recoñeceu unha atenuante de anomalía psíquica, aínda que sen ser moi cualificada.
Finalmente, a defensa alegou que a vítima incorrera en contradicións, pero o tribunal considera que a súa versión resulta "totalmente crible" e pon de manifesto que os episodios denunciados "non foron un feito illado, senón que a muller vivía nun clima de ameazas e violencia, que foi debullando na súa declaración ante o xulgado e que ratificou na vista oral",
